يو سړي د ځان له پاره کور جوړ کړ، له کوره ئې ژمنه واخیسته، څو چي زه ژوندی یم، وفا به راسره کوې، پر مابه نه نړېږې او مخکي له نړېدو به مي خبروې.
څه وخت وروسته د کور په دېوال کي چاک پیدا سو، سړي ژر چاک په خټو بند کړ؛ څه وخت وروسته د کور په بله برخه کي بل چاک پیدا سو، سړي بیا پټ کړ، دا کيسه څو ځله تکرار سوه.
یوه ورځ ناڅاپه کور ونړېد؛ سړي په ډېره غوسه کور ته دهغه کړې ژمنه وریاده کړه.
کور و سړي ته وویل: هر ځل مي غوښتل چي تاته خبر درکړم، خو تا به زما خوله په خټو رابنده کړه، زه به دي چپ کړم؛ دا د نه اورېدلو او خبرداري ته د پام نه کولو پایله ده! (مولانا_معنوي_بلخي)
#هدفــ: ژوند د مرګ د راتلو زېری دئ؛ موږ چي زړېږو مرګ ته نژدې کېږو، خو ددې پر ځای چي دا حقیقت ومنو، په بېلابېلو بهانو ځان تېر باسو.

په روسیه کي تازه انقلاب سوی وو، انقلابي بلشوکیانو د مخکنۍ تزاري واکمانانو ټولي کورنۍ قتل عام کړې.
یو سړي د مسکو ښار په سره میدان کي کاغذي اعلامیې خپرولې، دا سړی امنیتي کسانو ونیو؛ تر پلټنو وروسته متوجه سول چي ټولي اعلامیې سپين کاغذونه دي.
له سړي څخه ئې پوښتنه وکړه، ولي دي سپيني پاڼي وېشلې، ولي دي څه نه دي پر لیکلي؟
سړی ورته وویل: د لیکلو له پاره نور څه پاته نه دي، هر څه د لمر په څېر روښانه دي...!

#هدفــ: په افغانستان کي څلوېښت کلني جګړې موږ ته ټول دوستان او دښمنان را وپېژندل، نور دې ته اړتیا نسته چي سیاسیون دي موږ ته د تور او سپین، شرقي او غربي، ښی اړخو او کیڼ اړخو نغارې و ږغوي.

یوه ورځ ناست وي سره یاران وي
په غم ښادي کي سره دوستان وي
بــــــله ورځ کاږي د یـــــو بـل ږیره
په جنګ اخته د ګـور چنجیان وي

قانع

١٦جون٢٠٢٠

لمره دا ستا له برکته ده، دنیا روښانه
لکه په پلار چي وي د کور ټوله فضا روښانه
د کرونا افت سپينږيري له بچو واخیستل
رڼا تاریکه سوه د لمر، غم دئ تنها روښانه

قانع

٢١جون ٢٠٢٠

هم د خوښۍ هم د خفګان ټاټوبی
زما وجـــود د درد درمــان ټاټوبی

ته بې عجبه ګڼې داسـي هم سته
وي د کافـــر زړه د ایــمان ټاتوبی

مخامخ خوږ وي لکه ږغ د ابشار
خو پسِ شا وي د طوفان ټاټوبی

د ښـــو يـارانو له ټــــولۍ سو جلا
ځوانيمرګ خوښ کړ پر بيابان ټابی

چي د پردیو په لمســـون ورانېږي
دا زموږ کور دئ د افغــــان ټاټوبي

که اوښکي نه لري په سترګو کي ځاى
شکر لري لا پر ګــــــرېوان ټاټوبى

زه له انسـانه څه انسان ته تښتم
را څخه ورک دئ پر جهان ټاټوبی

د کــوچ و بار نغــارې و ږغېدې
قانع نور نه ویني د ځان ټاتوبی

۱۳۹۹/۴/۴ ل.

کاڼي پاسته لګېږي، سخت دئ ګزار د سترګو
تر دریاب لویي څپې، اوښکي د یار د سترګو

ستوري سترګک ووهي، چي زه سپوږمۍ ته ګورم
خندا د شوخو نجونو، یوسي قرار د سترګو

ما د خپل سر په بیه، زړه ته سکون ورکړی
هغه نامرد پر کوي، حملې په وار د سترګو

زه چي جهان يادوم، اول جانان یادوم
دئ د قندونو ټوټه، زما دئ هار د سترګو

پښتون چي ځوان سي کله، ټوپک و غاړي ته کي
پر تربور نښه زده کړي، تېز کړي خپل ښکار د سترګو

په دغه عکس کي زه، څنګه نتلی ښکارم
پر مخ شغلې نه لرم، زما د یار د سترګو

که دي قانع په کار وو، په ميخانه کې ګوره
مست او بېحاله به وي، یي به خمار د سترګو

سيداحمد قانع
د سرطان ٨مه ١٣٩٩ل.

پاچا په ښکار وتلی وو، ګیدړه په مخه ورغله، ده هڅه وکړه چي ګیدړه ژوندۍ ونیسي، خو ددې چالاکۍ پاچا ډېر ستړی کړ؛ دا چي ده ئې د نیولو هوډ کړی وو، تر ډېري ستړیا وروسته ئې ژوندۍ ونیول.
پاچا ګیدړي ته وویل: تا زه ډېر ستړی کړم، زه به داسي سزا درکړم، چي ته ژوندۍ یې، له ښکاره به خوند وانه خلې.
د ګیدړي په غاړه ئې زنګوله ور وځړول، په ځنګله کي ئې ایله کړه.
ګیدړه خوشحاله سوه، چي د پاچا له بنده ازاده سوه؛ خو له هغې ورځي څه نه په نس مړه سوه او نه ئې له ښکاره خوند واخیست، ځکه چي دا به ښکار ته نژدې سوه، هغه به زنګوله وشرنګېده، ښکار به وتښتېد، ګیدړه به وږې پاته سوه.

#هدفــ: هغه خلک چي د منفي افکارو ښکار سوي وي، هیڅکله به ښه ژوند او پرمختګ ونه کړي، هر وخت چي د یو ښه کار اراده وکړي، منفي افکار(زنګوله) به هغه ورته بد معلوموي.

کور په څلورو ښځو ښایسته وي، هیڅ وخت دي کور له دې څلورو ښځو نه خالي کېږي؛ لکه: مور، خور، مېرمن او لور

️ یو یهودي له روسیې څخه و اسرائیلو ته د تګ جواز تر لاسه کړ؛
کله چي له روسیې څخه وتئ، په هوایي ډګر کي یو مامور دده شیان چیک کړل، مجسمه ئې ولیده، ویل دا څه شي ده؟
یهودي ورته وویل: پوښتنه دي سمه نه ده، ووایه چي دا څوک دئ؟
دا د لینن مجسمه ده، د روسیې لوړ شخصیت دئ، چي په خپل هیواد کي ئې عدالت او ډیموکراسي برقراره کړه؛ زه دده شخصیت ته د درناوي په خاطر همیشه دا مجسمه له ځانه سره ګرځوم.
مامور ورته وویل: ډېر ښه، ځه مخ ته مو ښه.
کله چي سړی اسرائیلو ته ورسېد، په هوایي ډګر کي د ګمرک مامور مجسمه ولیده، له یهودي څخه ئې پوښتنه وکړه، ویل دا څه شي ده؟
سړي ورته وویل: ووایه چي دا څوک دئ؟
دا د هغه لیوني او منفور سړي مجسمه ده، چي زه یې له روسیې څخه وتلو ته مجبور کړم؛ زه همیشه دا مجسمه له ځان سره ګرځوم، چي هر وخت لعنت پر ووایم او پر تف کړم.
مامور ورته وویل: ډېر ښه، تاسو تللای سئ، مخته مو ښه.
څو ورځي وروسته یهودي په خپل کور کي خپله کورنۍ دعوت کړه؛ وراره ئې په المارۍ کي نموړې مجسمه ولیده، ویل: کاکاجانه دا څوک دئ؟
ده ورته وویل: زويه پوښتنه دي سمه نه ده، داسي ووایه چي دا څه شي ده؟
دا لس کیلو ګرامه ۲۴ عیاره سره زر دي، چي له روسیې څخه مي بېله ګمرکي محصوله دلته راوړل!

#هدفــ: "سیاست، یعني دا چي یوه خبره پر څو ډوله خلکو ته وکړې او هغوی ئې هم بېله دلیله درسره ومني"

داسي خالق لرو چي د ښه کار پر اراده اجر را کوي، خو د ګناه پر اراده تر هغه وخته سزا نه راکوي، څو چي مو عملاً ګناه کړې نه وي؛ تر دې جالبه لا دا چي تر ګناه کولو وروسته د ګناه پر پښېمانۍ هم بیرته اجر راکوي.
سبحان الله موږ څونده ناشکره بنده ګان یو!

یو فیلسوف چي ډېر ظلم ورسره سوی وو، د عدل له پاره پاچا ته و لاړ؛ پاچا ته ئې خپل حال بیان کړ، زارۍ ئې ورته وکړې، خو پاچا ئې پر خبره غوږ ونه نیوئ.
فیلسوف مجبور سو، د پاچا پښو ته ورولوېد، خپله غوښتنه ئې بیا ورته تکرار کړه.
پاچا خوشحاله سو، ژر ئې دده غوښتنه ومنله.
خلک د فیلسوف له دې کړني څه ناراضه سول، ده ته ئې په بدو ویلو خوله راخلاصه کړه؛ ویل ستا په څېر دروند عالم څنګه داسي سپک کار کولای سي!
فیلسوف ورته وویل: تاسو نه پوهېږئ، د پاچا غوږونه د سر پر ځای په پښو کي ول، زه مجبوره سوم، چي دده غوږو ته خبره ورسوم بله چاره مي نه درلوده!
#هدفــ: نننی حاکمان هغه وخت د مظلوم ږغ اوري، چي د غوږ پر ځای ئې خېټه او جېب له پیسو ور ډک کړې.