د سکروټي په څېر سوځم ايره کېږم
تازه کېږم د خپل تن لمبو ته باد يم
که د ستني پر سر نه ولاړم هدف ته
نه پتنګ يمه نه شمعه، نه فرهاد يم
ما ځيره په عاشقۍ ده ټوله کړې
طالب جان د ګل بشرې د درس استاد يم
سرکښي مي په ازل کښي ده اخښلې
آخر زه هم د آدم بابا اولاد يم
په خطا کي د مېږي پر قتل ژاړم
په ډېر وياړ د يرغلګر د سر جلاد يم
دا منم چي په هر جنګ کي ايره کېږم
ښه خو دا چي د ازاد ژوندون بنياد يم
ستا ددوو غزالو سترګو په ارمان کي
د مژګانو په سايه کي پټ صياد يم
د بوسې په غلا دي ما قاضي اعدام کړي
په مذهب کي د شیخانو لوی فساد يم
زمانې راسره داسي لطف کړی
په ځوانۍ کي د ارذل په عمر ښاد يم
که کفن کي دي د زلفو و پېچلم
قانع وړ په هغه ورځ د چا د داد يم
تړاو: غزل
Afghan Afghani Converter